Í því kalda loftslagi sem fyrirfinnst hér á landi mælum við með því að gæludýrakanínum sé búin aðstaða inni á heimilum en ekki utandyra. Það eru nokkrar góðar ástæður fyrir því að hýsa kanínur inni og má þar t.d. telja að þá eru þær verndaðar frá veðri, vindum og rándýrum auk þess sem þær verða frekar hluti af fjölskyldunni fái þær að dvelja inni hjá ykkur.

Það er hægt að fara nokkrar ólíkar leiðir þegar kanínu er fundið rými innandýra, Það má t.d. nota sérsmíðaðar girðingar, hvolpagirðingar eða einfaldlega herbergi sem búið er að gera að öruggu svæði fyrir kanínuna. Hér á eftir er nánar fjallað um þessa valkosti: 

Frjáls hlaup: einn valkosturinn er að leyfa kanínunni að fara frjáls ferða sinna í herbergi sem hefur verið útbúið með þarfir hennar í huga. Helst ætti það að vera í stærri kantinum með nægu gólfrými og almennt ætti einhver að hafa eftirlit með því að allt sé í lagi. Í einum hluta herbergisins ætti að vera kanínuklósett, kassi með heyi og matardallar. Í svona herbergi getur kanínan notið þeirra forréttinda að kanna umhverfi sitt á eigin hraða og hún hefur að sama skapi pláss til að hlaupa hratt þegar þörfin fyrir það vaknar. Það er gott ráð að hafa pappakassa í herberginu svo kanínan geti átt þar athvarf í einrúmi.

Hvolpa girðingar: Það er vel þess virði að velta fyrir sér því úrræði að setja upp hvolpagirðingu einhvers staðar innandyra fyrir kanínuna. Innan þeirra er nægilegt rými fyrir allt það sem kanínan þarfnast og hún veitir þeim einnig pláss til að hreyfa sig. Það er auðvelt að færa hvolpagirðingu úr stað ef þurfa þykir. Ef áhyggjur vegna gólfefna eða teppa eru til staðar þá er auðvelt að búa til undirlag innan girðingarinnar úr gólfdúk, gamalli mottu eða öðru plasti. Gleymdu ekki að ganga þannig frá að kanínan geti ekki skemmt gólfefnin með nagi! Hvolpagirðingar eru gagnlegar ef hugsunin er sú að leyfa kanínunni að vera frjáls innan herbergis seinna meir vegna þess að girðingin kemur í veg fyrir slys og minnkar áhættuna á streitu.

Heimatilbúin aðstaða: ef einhver heimilismanna er handlaginn þá eru möguleikarnir til sérsniðinna lausna endalausir. Tré, málmur, gömul húsgögn og annað hráefni getur verið fyrirtaks efniviður til að sníða til heimatilbúnar girðingar. Passaðu bara að ef þú notar málm eða tré þá þurfa bitarnir að liggja nógu þétt saman svo kanínan nái ekki að troða höfðinu á milli, slíkt getur verið slysagildra. 

Kanínubúr: Af öllum leiðunum sem hægt er að fara þá veita kanínubúr kanínunni minnsta plássið til að hreyfa sig, þess vegna mælum við með því að reyna hvolpagrind eða heimatilbúna girðingu fyrst ef mögulegt er. Ef þú tekur þá ákvörðun að búa kanínunni aðstöðu í stóru búri þarftu að gæta þess að hún fái nægan tíma utan búrs, nokkrar klukkustundir á dag hið minnsta. Búrið verður að vera nógu stórt til að rýma kanínuna vel, því stærra því betra! Hún verður að hafa nóg pláss til að hreyfa sig og hvílast, auk þess sem búrið þarf að rýma mat, vatn, kanínuklósett og leikföng.  Fiskabúr eru ekki góður kostur þar sem þau er vanalega of lítil og loftið þungt. Best er að á búrinu sé op sem kanínan getur notað til að fara inn og úr búrinu sjálf. 

Eins og sjá má þá er hægt að fara nokkrar ólíkar leiðir þegar kanínum er búin aðstaða. Þær þurfa stað þar sem þær finna fyrir öryggi en líka rými til þess að athafna sig og skoða sig um. Það veltur á fyrirkomulagi heimilisins hver besti valkosturinn er. Mundu bara að kanínur eru félagsverur svo þú skalt velja einhvern stað innan heimilisins þar sem öruggt er að kanínan muni ekki upplifa sig einmana og yfirgefna.